Ferteelinge foon Johannes Petersen nai utkiimen:

En schaame awt wååder

Johannes Petersen (1909-1992) wus di leeste foon möre wånderliirere, wat eefter e "Spracherlaß" foon 1927 trinam önj nordfrasche toorpsschoule fräsch unerruchteden. Ai sü bekånd as Johannes Petersen as schriwer. En latj soomling foon sin manere, mååst Noordergooshiirder stöögne än dachte hääwe Albert Panten än Christine Petersen ål 1999 ütdänj. Önj en wat gruter soomling ma di tiitel "En schaame awt wååder" heet Adeline Petersen nu sin fräsche ferteelinge, wat diiljwis önj e "Nordfriesische Rundschau" än diiljwis önj "Zwischen Eider und Wiedau" oufpränted wjarn, nai utdänj. Dåt grutst part foon daheere ferteelinge ståmt tit e tid twasche 1932 än 1936.

Johannes Petersen hiirt deerma ålhiil tu, wat önj e literatuur e "haimåtkunstbewääging" nåmd wårt, en bewääging, wat for ålem ma noome as Ferdinand Zacchi än Wilhelm Lobsien ferbunen as. Uk Peter Jensen, Nis Albrecht Johannsen än Katharine Ingwersen san fertreesere foon jüheer bewääging. Ja ferteele åltumååle am mansche awt lönj, wat jam ferbunen fäile ma da ouerlääwerde brtike än wise än forålem ma di griin, weer's aw laawe än arbe. Dåt deet jam hüülj önjt laawen, ouers dåt hanert jam uk än sak en ötwäi unti fin en liising, wan't iinjsen ai mor sii låpt, as's altens waane wään san. Siidänji säket ju waas önj e ferteeling "Inkenswärw" e düüs önjt wååder, ouerdåts ai ferhanere koon, dåt har doochter en moon uner harn äine stånd frait. Äiwensu rungeniirt di böre önj "San leeste gung" ham seelew an sin stää, ouerdåt sin wüf en uug aw huum ouers sman heet. Önj "Üülj stälj" namt di åltaatje ham et laawen, ouerdåt'r sin famiili ai långer tu lååst weese wal, än di loonstriker önj "Strootap, strootdil" braingt et ai klåår än kam tu sin äin toorp tubääg, weer'r as jungkjarl iinjsen ma en twari hood foon titnaid as. Sii swåårmödji san ouers ai åle stöögne. Önj "Di diiuwel önj e jölnåcht" beschraft Johannes Petersen uk, hii följk e bucht föiinj koon ouer manschne än ouer e woonluuwe.

Önjt hiile heet et bok 23 ferteelinge, wat eefter teemen ordned san, deertu hiire tuleest uk en påår düüntjes. Önjt foruurd heet Adeline Petersen en ütfäärlik ouersacht ouer, weer da stöögne jurtkaame, am wat for'n sliiks ferteelinge et ham hoonelt än hö's beårbed wörden san. Uk en kort beschriwing foon Johannes Petersen as er önj. E tiikning aw di nate amsliik as foon Marie Vriesema.

Foon frasch literatuur, wat gödj tu leesen as, jeeft et nuch fiir'n ålte lait. Ma jüheer soomling wårt ai bloots Johannes Petersen iird, ouers we hääwe uk nai leesmaterjool füngen tu e fraschunerrucht unti tu da, wat seelew fräsch liire wan. Et bok as önj e Ferlåch Nordfriisk Institiiut utkiimen än koost DM 19.80.

Ommo Wilts

Erstellt am 03.08.2001, veröffentlicht in Husumer Nachrichten am 14. 7. 2001


Nach oben

zurück